សកម្មភាពរបស់សហព័ន្ធខ្មែរកម្ពុជាក្រោម

សហព័ន្ធខ្មែរកម្ពុជាក្រោម នឹងប្រារព្ធពិធីអបអរសាទរនូវខួប ៧១ ឆ្នាំ នៃ ទិវាសិទ្ធិមនុស្សអន្តរជាតិ ដើម្បីរំឭកដល់ថ្ងៃដែលអង្គការសហប្រជាជាតិបានអនុម័តសេចក្ដីប្រកាសជា សកលស្ដីពីសិទ្ធិមនុស្ស កាលពីថ្ងៃទី ១០ ខែធ្នូ ឆ្នាំ ១៩៤៨ ។ ពិធីនេះ នឹងប្រារព្ធនៅថ្ងៃទី ៨ ខែធ្នូ ឆ្នាំ ២០១៩ ចុងសប្ដាហ៍នេះ ដោយសាខា នៃ សហព័ន្ធខ្មែរកម្ពុជាក្រោម ប្រចាំប្រទេស និង រដ្ឋនានាក្នុងទឹកដីសហរដ្ឋអាមេរិក ក្នុងនោះ មានប្រទេសបារាំង, អូស្ត្រាលី,កម្ពុជា, រដ្ឋ Florida និង ទីក្រុង San Jose រដ្ឋ California នៃ សហរដ្ឋអាមេរិក ។ នៅក្នុងទិវាសិទ្ធិមនុស្ស ១០ ធ្នូ ឆ្នាំនេះ ដែរ សហព័ន្ធខ្មែរកម្ពុជាក្រោម ក៏ធ្វើយុទ្ធនាការជម្រុញឲ្យ សមាជិក នៃ សហព័ន្ធខ្មែរកម្ពុជាក្រោម នៅគ្រប់ទិសទីពាក់អាវយឺតដែលមានអក្សរ “ខ្ញុំខ្មែរក្រោម” ឬ “ I am Khmer-Krom” ដើម្បីបង្ហាញពីអត្តសញ្ញាណរបស់ខ្លួនក្នុងនាមជាជនជាតិដើម នៃ ដែនដីកម្ពុជាក្រោម ។ ក្រៅពីនេះ នៅក្នុងទិវានេះដែរ សហព័ន្ធខ្មែរកម្ពុជាក្រោម ក៏នឹងធ្វើពិធីបង្សុកូលឧទ្ទិកុសលដល់យុវជនខ្មែរក្រោម ហ្វិញ ចុង (Huynh Chung) ដែលទើបតែត្រូវស្លាប់នៅក្នុងបន្ទាយទាហានយួន កាលពីថ្ងៃទី ២៩ ខែវិច្ឆិកា សប្ដាហ៍កន្លងទៅនេះ ដោយបានបន្សល់ទុកនូវក្ដីសង្ស័យពីពលរដ្ឋខ្មែរក្រោមថា យុវជនខ្មែរក្រោមរូបនេះត្រូវជនជាតិយួនព្រួតដៃគ្នាវៃរហូតដល់ស្លាប់ ។

តើ សហព័ន្ធខ្មែរកម្ពុជាក្រោម នឹងមានសកម្មភាពអ្វីខ្លះនៅក្នុងខែធ្នូ នេះ ? លោក ថាច់ វឿង នៃ ទូរទស្សន៍ ព្រៃនគរ និង វិទ្យុសំឡេងកម្ពុជាក្រោម (VOKK) បានធ្វើកិច្ចសម្ភាសន៍ ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម ដែលមានខ្លឹមសារទាំងស្រុង ដូចតទៅ៖